Train PNR: പതിറ്റാണ്ടുകൾ പഴക്കമുള്ള രീതി മാറുന്നു, ഇന്ത്യൻ റെയിൽവേയിൽ പുതിയ PNR സിസ്റ്റം വരുന്നു

ഇന്ത്യൻ റെയിൽവേ തങ്ങളുടെ ടിക്കറ്റ് റിസർവേഷൻ സംവിധാനത്തിൽ വലിയൊരു മാറ്റത്തിന് തയ്യാറെടുക്കുകയാണ്. യാത്രക്കാരുടെ പേര് വിവരങ്ങൾ രേഖപ്പെടുത്തുന്ന പാസഞ്ചർ നെയിം റെക്കോർഡ് (PNR) നമ്പറുകളുമായി ബന്ധപ്പെട്ട പതിറ്റാണ്ടുകൾ പഴക്കമുള്ള സംവിധാനമാണ് 2026 ഡിസംബറോടെ മാറാൻ പോകുന്നത്. റിസർവേഷൻ പ്രക്രിയ ആധുനികവൽക്കരിക്കുന്നതിന്റെ ഭാഗമായാണ് പുതിയ സംവിധാനം കൊണ്ടുവരുന്നത്.

റിപ്പോർട്ടുകൾ പ്രകാരം റെയിൽവേ മൈഗ്രേറ്റഡ് പിഎൻആർ സംവിധാനം അവതരിപ്പിക്കുകയാണ്. ഇപ്പോൾ നൽകുന്ന 10 അക്കങ്ങളുള്ള പിഎൻആർ നമ്പറുകൾ നിലവിലുള്ള നിശ്ചിത സീരീസ് അനുസരിച്ചാണ് തുടങ്ങുന്നത്. എന്നാൽ പുതിയ പിഎൻആർ നമ്പറുകൾ 1, 3, 5 അല്ലെങ്കിൽ 7 തുടങ്ങിയ ഒറ്റ സംഖ്യകളിൽ മാത്രമായിരിക്കും ആരംഭിക്കുക. സെന്റർ ഫോർ റെയിൽവേ ഇൻഫർമേഷൻ സിസ്റ്റംസിന്റെ (CRIS) നേതൃത്വത്തിലാണ് റെയിൽവേ റിസർവേഷൻ സിസ്റ്റത്തിന്റെ നവീകരണം നടപ്പിലാക്കുന്നത്. പിഎൻആർ മൈഗ്രേഷനുമായി ബന്ധപ്പെട്ട പൈലറ്റ് പദ്ധതിക്കായി ഏകദേശം 1,230 ട്രെയിനുകൾ തിരഞ്ഞെടുത്തിട്ടുണ്ടെന്നും റിപ്പോർട്ടുകൾ പറയുന്നു.

ഡിസംബർ മൂന്നാമത്തെ ആഴ്ചയോടെ പുതിയ മാറ്റം പൂർണ്ണമായി നിലവിൽ വരും. ഒരുപക്ഷേ നിലവിൽ ടിക്കറ്റ് എടുത്ത ചില യാത്രക്കാരെ പുതിയ സിസ്റ്റം ബാധിച്ചേക്കാം. പഴയ സിസ്റ്റത്തിന് കീഴിൽ ടിക്കറ്റ് ബുക്ക് ചെയ്യുകയും പിന്നീട് യാത്രാ തീയതി മാറ്റാൻ ആഗ്രഹിക്കുകയും ചെയ്താൽ, സിസ്റ്റം മാറ്റിയതിന് ശേഷം അത് സാധ്യമായേക്കില്ല. അത്തരം സന്ദർഭങ്ങളിൽ യാത്രക്കാർ നിലവിലെ ടിക്കറ്റ് കാൻസൽ ചെയ്ത് പുതിയ സിസ്റ്റത്തിന് കീഴിൽ പുതിയ ടിക്കറ്റ് ബുക്ക് ചെയ്യേണ്ടി വന്നേക്കാം. അതിനാൽ ബുക്കിംഗുകളിൽ മാറ്റങ്ങൾ വരുത്തുന്നതിന് മുമ്പ് ഏറ്റവും പുതിയ ഔദ്യോഗിക വിവരങ്ങൾ പരിശോധിക്കാൻ റെയിൽവേ യാത്രക്കാരോട് നിർദ്ദേശിക്കുന്നു.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിലും. ZEE MALAYALAM App ഡൗൺലോഡ് ചെയ്യൂ. Android Link.