Thiruvananthapuram

Photo Gallery

Diana's Revenge Dress Auction: ഡയാനയുടെ ചരിത്രപ്രസിദ്ധമായ 'റിവഞ്ച് ഡ്രസ്' വീണ്ടും ലേലത്തിന്

Mekha P Panicker11d ago

പ്രിൻസസ് ഡയാനയുടെ ചരിത്രപ്രസിദ്ധമായ റിവഞ്ച് ഡ്രസ് ഏകദേശം മൂന്ന് പതിറ്റാണ്ടുകൾക്ക് ശേഷം വീണ്ടും ലേലത്തിന് വെക്കുന്നു.

വസ്ത്രങ്ങളിലൂടെ ആശയവിനിമയം നടത്താൻ സാധിക്കും. അതിന് വ്യക്തമായ ഒരു ഉദാഹരണമാണ് 1994 ജൂൺ 29-ന് പ്രിൻസസ് ഡയാന ലണ്ടനിലെ ഹൈഡ് പാർക്കിലുള്ള സെർപെന്റൈൻ ഗാലറിയിലെ വിരുന്നിൽ പങ്കെടുക്കാൻ എത്തിയപ്പോൾ ധരിച്ച കറുത്ത 'റിവഞ്ച് ഡ്രസ്'. രാജകീയ കുടുംബത്തിന്റെ കർശനമായ വസ്ത്രധാരണ പ്രോട്ടോക്കോളുകളാണ് ഡയാന അന്ന് കാറ്റിൽപ്പറത്തിയത്.

‍ഡയാനയുടെ ഭർത്താവ് പ്രിൻസ് ചാൾസ് ടെലിവിഷൻ അഭിമുഖത്തിലൂടെ ഡയാനയുമായുള്ള ബന്ധത്തിലെ തകർച്ചയും പ്രിൻസിന്റെ അവിഹിത ബന്ധവും പരസ്യമായി സമ്മതിച്ച അതേ ദിവസമാണ് ഡയാന ഈ വസ്ത്രം ധരിച്ചത്. ജനങ്ങളുടെ മുന്നിൽ തന്റെ ആത്മവിശ്വാസവും സ്വാതന്ത്ര്യവും പ്രകടിപ്പിക്കാനാണ് ഡയാന ഗ്രീക്ക് ഡിസൈനറായ ക്രിസ്റ്റിന സ്റ്റാംബോലിയൻ രൂപകൽപ്പന ചെയ്ത ഈ കറുത്ത ഗൗൺ തിരഞ്ഞെടുത്തത്.

രാജകീയ കുടുംബത്തിന്റെ വസ്ത്രധാരണ പ്രോട്ടോക്കോള്‍ പ്രകാരം കറുത്ത വസ്ത്രങ്ങള്‍ ശവസംസ്കാര ചടങ്ങുകള്‍ക്ക് മാത്രമാണ് ഉപയോഗിക്കുന്നത്. പൊതുപരിപാടികളില്‍ പങ്കെടുക്കാന്‍ കറുത്ത വസ്ത്രങ്ങള്‍ തിരഞ്ഞെടുക്കരുത് മാത്രമല്ല തൊപ്പിയോ, സ്റ്റോക്കിങ്സോ ധരിക്കാതെയാണ് ഡയാന പൊതുവേദിയില്‍ പ്രത്യക്ഷപ്പെട്ടത്.

ഡയാനയുടെ റിവഞ്ച് ഡ്രസ് 2026 ഡിസംബര്‍ 9-ന് ന്യൂയോര്‍ക്കിലെ സോതെബീസില്‍ (Sotheby's) നടക്കുന്ന ലേലത്തില്‍ വെയ്ക്കുന്നുണ്ട്. മൂന്ന് പതിറ്റാണ്ടുകള്‍ക്ക് ശേഷമാണ് 'റിവഞ്ച് ഡ്രസ്' വീണ്ടും ലേലത്തിലെത്തുന്നത്. 1,50,000 ഡോളറിനും 3,00,000 ഡോളറിനും ഇടയില്‍ (1.43-2.87 കോടി) വില ലഭിക്കുമെന്നാണ് പ്രതീക്ഷിക്കുന്നത്. ലേലത്തില്‍ നിന്ന് ലഭിക്കുന്ന തുകയുടെ ഒരു ഭാഗം ജീവകാരുണ്യ പ്രവര്‍ത്തനങ്ങള്‍ക്കായി സംഭാവന ചെയ്യും.

ഇതിന് മുന്‍പ് 1997 ജൂണില്‍ തന്റെ മരണത്തിന് രണ്ടുമാസം മുന്‍പാണ് കാന്‍സര്‍, എയ്ഡ്സ് തുടങ്ങിയ ജീവകാരുണ്യ പ്രവര്‍ത്തനങ്ങള്‍ക്ക് ഫണ്ട് കണ്ടെത്താനായി ഡയാന തന്റെ 79 വസ്ത്രങ്ങള്‍ ലേലത്തില്‍ വെച്ചത്. അന്ന് ലേലത്തില്‍ നിന്നാണ് 'റിവഞ്ച് ഡ്രസ്' ഒരു ദമ്പതികള്‍ സ്വന്തമാക്കിയത്.

Mekha P Panicker