Thiruvananthapuram

Sugar intake in Kids: ചെറുപ്പത്തിലെ മധുരം ഭാവിയിൽ അപകടം; 2 വയസിൽ താഴെയുള്ള കുട്ടികൾക്ക് മധുരം നൽകരുത്!

Written by: Mekha P Panicker Updated by: Karthika V

Published: Oct 10, 2026, 07:59 PM | Updated: Oct 10, 2026, 07:59 PM

കുട്ടികള്‍ ആദ്യ 1000 ദിവസം കഴിക്കുന്ന മധുരം ഭാവിയിലെ ഓർമ്മശക്തിയെ ബാധിക്കും.

കുട്ടികള്‍ ചെറുപ്പത്തിൽ കഴിക്കുന്ന മധുരത്തിന്റെ അളവ് ഭാവിയില്‍ അവരുടെ മാനസിക ശാരീരിക ആരോഗ്യത്തെ ബാധിക്കുമെന്ന് പറഞ്ഞാൽ വിശ്വസിക്കുമോ? പുതിയ പഠനം പറയുന്നത് പ്രകാരം ഗർഭാവസ്ഥയിലുള്ളത് മുതൽ രണ്ടു വയസ്സ് വരെയുള്ള 1000 ദിവസങ്ങളിൽ കുട്ടികളിലെ പഞ്ചസാരയുടെ ഉപയോഗം നിയന്ത്രിക്കണം എന്നാണ്. ഇപ്പോൾ കഴിക്കുന്ന മധുരമാണ് ഇവർക്ക് പിൽക്കാലത്ത് ഡിമെൻഷ്യ (ഓർമ്മക്കുറവ്), ഉത്കണ്ഠ, മറ്റ് മാനസിക ബുദ്ധിമുട്ടുകള്‍ വരാനുള്ള സാധ്യത നിയന്ത്രിക്കുന്നത്.

എൻ‌പി‌ജെ ഏജിംഗ് ജേണലിൽ പ്രസിദ്ധീകരിച്ച പഠനത്തിൽ എലികളെയാണ് നിരീക്ഷണത്തിന് വിധേയമാക്കിയത്. ഇതിൽ ചെറുപ്പത്തിൽ പഞ്ചസാര ലഭിക്കുന്നത് നിർത്തിയതിനെ ആശ്രയിച്ചാണ് പിന്നീടുള്ള എലികളുടെ ഓർമ്മശക്തിയെന്ന് കണ്ടെത്തി. രണ്ടാം ലോകമഹായുദ്ധത്തിനുശേഷം യുകെയിൽ പഞ്ചസാരയ്ക്ക് റേഷൻ ഏർപ്പെടുത്തിയ സമയത്ത് ജനിച്ച 60,394 ആളുകളുടെ ആരോഗ്യ വിവരങ്ങളും ഗവേഷകർ പരിശോധിച്ചു. പഞ്ചസാരയ്ക്ക് റേഷൻ ഏർപ്പെടുത്തിയ സമയത്ത് മറ്റ് വർഷങ്ങളെ അപേക്ഷിച്ച് വളരെ കുറവ് ഉപഭോഗം മാത്രമായിരുന്നു മധുരത്തിൽ ഉണ്ടായത്. ഇവരിൽ പിൻകാലത്ത് ചില പ്രത്യേകതകൾ കാണാൻ കഴിഞ്ഞു. ഇവരില്‍ ഡിമെൻഷ്യയുടെ സാധ്യത 27% കുറവാണ് മാത്രമല്ല അൽഷിമേഴ്‌സ് രോഗ സാധ്യത 20% കുറവ്, ഉത്കണ്ഠയ്ക്കുള്ള സാധ്യത 20% കുറവ്, വിഷാദരോഗ സാധ്യത 11% കുറവാണെന്ന് കണ്ടെത്തി.

കൂടുതൽ പഞ്ചസാര കഴിക്കുന്നത് അമിതവണ്ണം, ഇൻസുലിൻ പ്രതിരോധം, ശരീരത്തിൽ വീക്കം എന്നിവയ്ക്ക് കാരണമാകും. ഇവയെല്ലാം തലച്ചോറിന്റെ ആരോഗ്യത്തെ ബാധിച്ചേക്കാം. നാഷണൽ ഇൻസ്റ്റിറ്റ്യൂട്ട് ഓഫ് ഹെൽത്ത് (NIH) മെറ്റബോളിക് ആരോഗ്യവും വീക്കവും നാഡീസംബന്ധമായ രോഗങ്ങളും തമ്മിലുള്ള ബന്ധത്തെക്കുറിച്ച് ആശങ്ക പ്രകടിപ്പിക്കുന്നുണ്ട്. ചെറുപ്പകാലത്തെ പഞ്ചസാരയുടെ ഉപയോഗം പിന്നീട് ഡിമെൻഷ്യ വരാനുള്ള സാധ്യതയെ എങ്ങനെ ബാധിക്കുന്നുവെന്ന് പൂർണ്ണമായി മനസ്സിലാക്കാൻ കൂടുതൽ പഠനങ്ങൾ ആവശ്യമാണ്.

കുട്ടിക്കാലത്തെ പഞ്ചസാരയുടെ ഉപയോഗം കുറയ്ക്കുന്നത് മെച്ചപ്പെട്ട ആരോഗ്യവുമായി ബന്ധപ്പെട്ടിരിക്കുന്നുവെന്ന് കണ്ടെത്തലുകൾ സൂചിപ്പിക്കുന്നു. അതേസമയം തന്നെ പഞ്ചസാര പൂർണ്ണമായി ഉപയോഗിക്കാത്തതാണ് നല്ലതെന്ന് ഉറപ്പിച്ച് പറയാനാവില്ലെന്നും ഗവേഷകർ വ്യക്തമാക്കുന്നു. മറ്റ് ജീവിതശൈലി ഘടകങ്ങൾ, ജനിതക പ്രത്യേകതകൾ, മൊത്തത്തിലുള്ള പോഷകാഹാര ലഭ്യത എന്നിവയും ആരോഗ്യഫലങ്ങളെ സ്വാധീനിക്കുന്നതാണ്.

ചെറിയ പ്രായത്തിൽ തന്നെ കുട്ടികൾക്ക് അമിത മധുരമുള്ള മിഠായി അടക്കം നൽകാതിരിക്കുക. ഇന്ന് ലഭിക്കുന്ന പല പലഹാരങ്ങളിലും മധുരത്തിന് വേണ്ടി പല കെമിക്കലുകളും ചേര്‍ക്കുന്നതാണ്. സ്വാഭാവിക മധുരമെന്ന് പരസ്യപ്പെടുത്തുന്ന പലതിലും കാര്യങ്ങള്‍ അത്ര സ്വാഭാവികമല്ല. അതുകൊണ്ട് ഒരു വയസ്സിന് താഴെയുള്ള കുട്ടികള്‍ക്ക് കഴിക്കാന്‍ നല്‍കേണ്ട ആരോഗ്യകരമായ ഭക്ഷണങ്ങളെക്കുറിച്ചും മാതാപിതാക്കൾ പ്രത്യേക ശ്രദ്ധ പുലർത്തേണ്ടതുണ്ട്.

#Health News #Health Tips

Mekha P Panicker