Thiruvananthapuram

Vijayadashmi 2026: ഹരിശ്രീ കുറിച്ച് ആയിരങ്ങള്‍, കേരളത്തിലെ പ്രശസ്തമായ വിദ്യാരംഭ കേന്ദ്രങ്ങള്‍

Written & Updated by: Mekha P Panicker

Published: Oct 21, 2026, 11:02 AM | Updated: Oct 21, 2026, 11:02 AM

കേരളത്തിലെ വിദ്യാരംഭ ചടങ്ങുകള്‍ നടന്ന ചില പ്രമുഖ ക്ഷേത്രങ്ങളും സാംസ്കാരിക കേന്ദ്രങ്ങളും പരിശോധിക്കാം…

വിജയദശമി ദിനമായ ഇന്ന് ആയിരക്കണക്കിന് കുട്ടികളാണ് അറിവിന്റെ ലോകത്തേക്ക് ചുവടുവെച്ചത്. കേരളത്തിൽ വിദ്യാരംഭ ചടങ്ങുകൾക്കായി വിപുലമായ ക്രമീകരണങ്ങളാണ് ഏര്‍പ്പെടുത്തിയത്. അത്തരത്തിൽ കേരളത്തിൽ വിദ്യാരംഭത്തിന് ഏറ്റവും കൂടുതൽ ആളുകൾ എത്തിച്ചേര്‍ന്ന പ്രമുഖ ക്ഷേത്രങ്ങളും സാംസ്കാരിക കേന്ദ്രങ്ങളും പരിശോധിക്കാം...

ദക്ഷിണ മൂകാംബിക എന്ന പേരിലറിയപ്പെടുന്ന കേരളത്തിലെ പ്രശ്സ്തമായ സരസ്വതി ക്ഷേത്രമാണ് കോട്ടയം ജില്ലയിലെ പനച്ചിക്കാട് സരസ്വതി ക്ഷേത്രം. ഇവിടെ പ്രധാന പ്രതിഷ്ഠ മഹാവിഷ്ണുവാണെങ്കിലും സരസ്വതീ സാന്നിധ്യവും പൂജകളുമാണ് ക്ഷേത്രത്തെ കൂടുതല്‍ പ്രശസ്തമാക്കിയത്. വര്‍ഷത്തില്‍ എല്ലാ ദിവസവും ഇവിടെ വിദ്യാരംഭ ചടങ്ങുകള്‍ നടത്താന്‍ സാധിക്കും.

രാവിലെ മഹാസരസ്വതിയായും ഉച്ചയ്ക്ക് മഹാലക്ഷ്മിയായും വൈകുന്നേരം മഹാകാളിയായും ദേവിയെ ആരാധിക്കുന്ന പ്രശസ്തമായ എറണാകുളം ജില്ലയിലെ ഭഗവതി ക്ഷേത്രമാണ് ചോറ്റാനിക്കര ക്ഷേത്രം. നവരാത്രി കാലത്തും വിജയദശമി ദിനത്തിലും വിദ്യാദേവിയുടെ അനുഗ്രഹത്തോടെ കുരുന്നുകളെ എഴുത്തിനിരുത്താന്‍ വന്‍ ഭക്തജനത്തിരക്കാണ് ഇവിടെ അനുഭവപ്പെടുന്നത്.

മലയാള ഭാഷയുടെ പിതാവായ തു‍ഞ്ചത്തെഴുത്തച്ഛന്റെ ജന്മഭൂമിയായ മലപ്പുറം തിരൂരിലെ തുഞ്ചന്‍ പറമ്പ് സാഹിത്യ-സാംസ്കാരിക രംഗത്തുള്ളവര്‍ക്ക് ഏറെ പവിത്രമായ ഇടമാണ്. ഇവിടെയുള്ള സരസ്വതി മണ്ഡപത്തിലും കാഞ്ഞിരമരത്തണലിലും കുരുന്നുകളെ എഴുത്തിനിരുത്തുന്നത് വിശേഷപ്പെട്ടതായി കരുതപ്പെടുന്നു. പ്രശസ്ത എഴുത്തുകാരും സാംസ്കാരിക നായകരുമാണ് ഇവിടെ കുട്ടികള്‍ക്ക് ആദ്യാക്ഷരം പകര്‍ന്നു നല്‍കുന്നത്.

തിരുവനന്തപുരം ജില്ലയിലെ പ്രശസ്തമായ സരസ്വതി സങ്കേതങ്ങളിലൊന്നാണ് പൂജപ്പുര. വിജയദശമി ദിനത്തില്‍ ആയിരക്കണക്കിന് കുട്ടികളാണ് പൂജപ്പുര സരസ്വതി മണ്ഡപത്തില്‍ വിദ്യാരംഭം കുറിക്കുന്നത്. ഇവിടെ നടക്കുന്ന നവരാത്രി സംഗീതോത്സവവും വിദ്യാരംഭ ചടങ്ങുകളും ഏറെ പ്രശസ്തമാണ്.

Mekha P Panicker