Thiruvananthapuram

Tesla Roadster: ടെസ്‍ല റോഡ്സ്റ്റര്‍ ബുക്കിങ് ഇന്ത്യയില്‍ ആരംഭിച്ചു; റിസര്‍വേഷന്‍ തുക 2.50 കോടി വരെ!

Written by: Mekha P Panicker Updated by: Karthika V

Published: Oct 20, 2026, 07:09 PM | Updated: Oct 20, 2026, 07:09 PM

സ്പേസ്എക്സ് റോക്കറ്റ് സാങ്കേതികവിദ്യയുമായി എത്തുന്ന ടെസ്‍ല റോഡ്സ്റ്റര്‍ ഹൈപ്പര്‍ കാറിന്റെ ഇന്ത്യയിലെ ബുക്കിംഗ് ആരംഭിച്ചു.

അമേരിക്കന്‍ ഇലക്ട്രിക് വാഹന നിര്‍മ്മാതാക്കളായ ടെസ്‍ല നിര്‍മ്മിക്കുന്ന അതിവേഗ ഹൈപ്പര്‍ കാറാണ് ടെസ്‍ല റോഡ്സ്റ്റര്‍ (Tesla Roadster). സയന്‍സ് ഫിക്ഷന്‍ സിനിമകളില്‍ മാത്രം കണ്ടിരുന്ന രീതിയില്‍ പ്രവ‌ര്‍ത്തിക്കാന്‍ റോഡ്സ്റ്ററിന് സാധിക്കും. റോക്കറ്റുകളില്‍ ഉപയോഗിക്കുന്ന 'കോള്‍ഡ് ഗ്യാസ് തൃസ്റ്ററുകള്‍' (Cold Gas Thrusters) ഉപയോഗിച്ച് ചെറിയ രീതിയിലാണെങ്കിലും വാഹനം അന്തരീക്ഷത്തില്‍ ഉയര്‍ന്ന് നില്‍ക്കും.

ലോകത്തെ അമ്പരിപ്പിച്ച ടെസ്‍ല റോഡ്സ്റ്ററിനായുള്ള ബുക്കിങ് ഇന്ത്യയിലും ആരംഭിച്ചു. എന്നാല്‍ പെര്‍ഫോമന്‍സ് പതിപ്പിന് റിസര്‍വേഷന്‍ തുക 50.06 ലക്ഷം രൂപയാണ്. ആഡംബര പതിപ്പായ ത്രസ്റ്റ് കോണ്‍ഫിഗറേഷനായി 2.50 കോടി രൂപ റിസര്‍വേഷന്‍ തുകയായി മാത്രം നല്‍കണം. ഇത്രയും തുക റിസര്‍വേഷനായി മാത്രം നല്‍കണമെങ്കിലും ഇന്ത്യയില്‍ വാഹനം എന്നത്തേക്ക് ഡെലിവറി ചെയ്യുമെന്ന് ടെസ്‍ല വ്യക്തമാക്കിയിട്ടില്ല.

റോഡ്സ്റ്റര്‍ പെര്‍ഫോമന്‍സ് പതിപ്പില്‍ രണ്ട് പേര്‍ക്ക് യാത്ര ചെയ്യാം. കാര്‍ വേഗത്തില്‍ ഓടുമ്പോള്‍ റോഡില്‍ ഉറച്ചുനില്‍ക്കാന്‍ സഹായിക്കുന്ന പ്രത്യേക സംവിധാനങ്ങള്‍ ഇതിലുണ്ട്. ഇതിനുപുറമേ ആക്സിലറേഷന്‍ തൃസ്റ്ററുകളുണ്ട്. റേസിംഗിന് തയാറാക്കിയ പരിമിതമായ എണ്ണത്തില്‍ മോഡല്‍ ലഭ്യമാണ്.

ഒരാള്‍ക്ക് മാത്രം യാത്രചെയ്യാന്‍ സാധിക്കുന്നതാണ് റോഡ്സ്റ്ററിന്റെ റോക്കറ്റ് കോണ്‍ഫിഗറേഷന്‍ (Rocket Configuration). ഫുള്‍ ഫ്ലൈറ്റ് സിസ്റ്റം എന്നാണ് ടെസ്‍ല റോക്കറ്റ് കോണ്‍ഫിഗറേഷനെ വിശേഷിപ്പിക്കുന്നത്. എന്നാല്‍ ഇന്ത്യയിലെ ബുക്കിംഗ് പേജില്‍ ഇതിന്റെ റിസര്‍വേഷന്‍ തുക നല്‍കിയിട്ടില്ല. പ്രത്യേക ക്ഷണം ലഭിക്കുന്നവര്‍ക്ക് മാത്രമുള്ളതാണ് ഈ പതിപ്പ്.

റോഡ്സ്റ്ററിന്റെ രൂപകല്‍പ്പന SR-71, F-35 യുദ്ധവിമാനങ്ങളില്‍ നിന്ന് പ്രചോദനം ഉള്‍ക്കൊണ്ടാണ്. കാറിന്റെ അകവശം ഒരു വിമാനത്തിലെ കോക്ക്പിറ്റ് പോലെയാണ് ഒരുക്കിയിരിക്കുന്നത്.

#Automobile #India

Mekha P Panicker