Thiruvananthapuram

IV Drip Therapy: നവരാത്രി ആഘോഷങ്ങളിൽ ട്രെൻഡായി ഐവി ഡ്രിപ്പ് തെറാപ്പി; മുന്നറിയിപ്പുമായി ഡോക്ടർമാർ

Written by: Mekha P Panicker Updated by: Karthika V

Published: Oct 12, 2026, 07:42 PM | Updated: Oct 12, 2026, 07:42 PM

നവരാത്രി ആഘോഷങ്ങളിൽ ഊർജ്ജവും തിളക്കമുള്ള ചർമ്മവും നേടാനായി അഹമ്മദാബാദിലെ യുവാക്കൾ ഐവി ഡ്രിപ്പുകൾ തേടുന്നു

നവരാത്രിയോട് അനുബന്ധിച്ചുള്ള ആഘോഷങ്ങൾ വലിയ രീതിയിലാണ് വൈറലാകുന്നത് എന്നാൽ ഈ വർഷം ചിലരുടെ ഉത്സവ തയാറെടുപ്പുകൾ മറ്റ് രീതിയിലാണ് വാർത്തകളിൽ ഇടംപിടിക്കുന്നത്. അഹമ്മദാബാദിലെ യുവാക്കൾക്കിടയിൽ ഇൻട്രാവെനസ് (IV) ഡ്രിപ്പ് തെറാപ്പി വൈറലാകുകയാണ്. പലരും വെൽനസ് ക്ലിനിക്കുകളിൽ ഐവി ഡ്രിപ്പ് സെഷനുകൾ ബുക്ക് ചെയ്യാൻ തുടങ്ങി. ആഘോഷങ്ങളിൽ ഉന്മേഷം ലഭിക്കാനാണ് ഐവി ഡ്രിപ്പ് തെറാപ്പി തിര‍ഞ്ഞെടുക്കുന്നത്.

ശരീരത്തില്‍ ദ്രാവകങ്ങളും പോഷകങ്ങളും നേരിട്ട് രക്തക്കുഴലുകളിലേക്ക് എത്തിക്കുന്ന രീതിയാണ് ഇൻട്രാവെനസ് (IV) ഡ്രിപ്പ് തെറാപ്പി. ചര്‍മ്മത്തിന്റെ തിളക്കം, ജലാംശം, ഊര്‍ജ്ജം എന്നിവ വര്‍ദ്ധിപ്പിക്കാന്‍ പല ബ്യൂട്ടി വെല്‍നസ് ക്ലിനിക്കുകള്‍ ഐവി ഡ്രിപ്പ് സെഷനുകൾ നല്‍കുന്നുണ്ട്.

നവരാത്രി ദിവസം രാത്രി ഏറെ വൈകിയാണ് ആഘോഷങ്ങള്‍ നടക്കുക. അഹമ്മദാബാദിലും നോർത്ത് ഇന്ത്യയിലെ മറ്റ് നഗരങ്ങളിലും മണിക്കൂറുകൾ നീണ്ട നൃത്തവും മറ്റ് ആഘോഷപരിപാടികളുമുണ്ട്. ക്ഷീണം നിയന്ത്രിക്കാനും പരിപാടികളില്‍ ഉന്മേഷം നിലനിര്‍ത്താനുമാണ് കൗമാരക്കാര്‍ അടങ്ങുന്ന വലിയൊരു വിഭാഗം ഇത്തരം ഐവി സെഷനുകള്‍ അന്വേഷിച്ച് നടക്കുന്നത്.

4,000 മുതൽ 10,000 രൂപ വരെയാണ് ഒരു ഐവി ഡ്രിപ്പ് സെഷന്റെ ചെലവ്. ക്ലിനിക്ക്, ഡ്രിപ്പ് സെഷന് ഉപയോഗിച്ച മരുന്നുകൾ, എത്ര സെഷൻ വേണം എന്നിവയെ ആശ്രയിച്ചാണ് അന്തിമ തുക നിശ്ചയിക്കുന്നത്. അഹമ്മദാബാദിലെ ഐവി ഡ്രിപ്പ് സെഷനുകള്‍ നല്‍കുന്ന പല ക്ലിനിക്കുകളും 15,000 രൂപ വരെ ഈടാക്കാറുണ്ട്.

ഐവി ഡ്രിപ്പ് സെഷനുകള്‍ എടുക്കുന്നതിന് മുന്‍പ് മെഡിക്കല്‍ നിരീക്ഷണം അത്യാവശ്യമാണ്. രോഗങ്ങള്‍ക്കോ പോഷകക്കുറവിനോ ചികിത്സയായാണ് സാധാരണ ഐവി തെറാപ്പി നല്‍കാറുള്ളത്. എന്നാല്‍ യാതൊരുവിധ ആരോഗ്യപ്രശ്നങ്ങളുമില്ലാത്തവര്‍ വെറും സൗന്ദര്യത്തിനും തിളക്കത്തിനുമായി ഇവ സ്വീകരിക്കുന്നത് അനാവശ്യമായ ആരോഗ്യപ്രശ്നങ്ങള്‍ക്ക് കാരണമാകും.

#Health News #India News

Mekha P Panicker