Thiruvananthapuram

Apple MacBook Pro OLED: ടച്ച്സ്ക്രീന്‍ സൗകര്യവും ഒഎല്‍ഇഡി ഡിസ്പ്ലേയുമായി മാക്ബുക്ക് പ്രോ വരുന്നു!

Written by: Mekha P Panicker Updated by: Karthika V

Published: Oct 25, 2026, 07:45 PM | Updated: Oct 25, 2026, 07:45 PM

ആപ്പിളിന്റെ ചരിത്രത്തില്‍ ആദ്യമായി ടച്ച്സ്ക്രീന്‍ സൗകര്യവും ഒഎല്‍ഇഡി (OLED) ഡിസ്പ്ലേയും ഉള്‍പ്പെടുന്ന പുതിയ മാക്ബുക്ക് പ്രോ മോഡല്‍ എത്തുന്നു.

ഒക്ടോബര്‍ 28ന് ലോസ് ഏഞ്ചല്‍സിൽ ആപ്പിളിന്റെ 'പ്രോ ആന്‍‍ഡ് ടെല്‍' ഇവന്റ് നടക്കും. മാക്ബുക്കിൽ ആദ്യമായിട്ടാണ് ടച്ച്സ്ക്രീന്‍ സൗകര്യവും ഒഎല്‍ഇഡി ഡിസ്പ്ലേയും ആപ്പിള്‍ അവതരിപ്പിക്കുന്നത്. ഇതിനൊപ്പം തന്നെ ഒഎല്‍ഇഡി പാനലോട് കൂടിയ പുതിയ ഐപാഡ് മിനിയും പുതിയ മാക്, ഐമാക് മോഡലുകളും ഇവന്റില്‍ പ്രതീക്ഷിക്കുന്നു.

എല്‍സിഡി സ്ക്രീനുകള്‍ക്ക് ആവശ്യമായ പ്രത്യേക ബാക്ക്ലൈറ്റിന്റെ ആവശ്യമില്ലാത്തത് കൊണ്ട് തന്നെ ഒഎല്‍ഇഡി ഡിസ്പ്ലെയ്ക്ക് കട്ടി കുറവായിരിക്കും. ഇതിനാൽ ലാപ്ടോപ്പിന്റെ ഭാരം കുറവായിരിക്കും. മാക്ബുക്കുകളില്‍ ഉപയോഗിക്കുന്ന ടാന്‍ഡം ഒഎല്‍ഇഡി പാനലുകള്‍ ഡിസ്പ്ലേയുടെ തെളിച്ചം ഗണ്യമായി വര്‍ദ്ധിപ്പിക്കും. ഊര്‍ജ ഉപഭോഗം കുറയ്ക്കുകയും സ്ക്രീനിന്റെ ആയുസ്സ് കൂട്ടുകയും ചെയ്യും.

നിലവിലെ മാക്ബുക്ക് പ്രോകളുടെ ഡിസ്പ്ലേ ഇതിനോടകം തന്നെ മികച്ചതാണ്. എന്നാല്‍ ഒഎല്‍ഇഡി സ്ക്രീന്‍ കൂടി വരുന്നതോടെ പുതിയ മോഡല്‍ തകര്‍പ്പനായിരിക്കും. നേരത്തെ തന്നെ ഐഫോണുകളില്‍ ഒഎല്‍ഇഡി ഉപയോഗിക്കുന്നുണ്ടെങ്കിലും വലിയ സ്ക്രീനുകളില്‍ ഐപാഡ് പ്രോയില്‍ മാത്രമാണ് ആപ്പിള്‍ ഇത് നല്‍കിയത്. ഇപ്പോള്‍ ഒഎല്‍ഇഡി സാങ്കേതികവിദ്യ മാക്ബുക്കിലേക്കും എത്തുകയാണ്.

ഒഎല്‍ഇഡി ഡിസ്പ്ലേ പൂര്‍ണ്ണമായും ടച്ച്സ്ക്രീന്‍ സൗകര്യമുള്ളതാണ്. കൂടാതെ 'മാക്ഒഎസ് ഗോള്‍ഡന്‍ ഗേറ്റ്' (macOS Golden Gate) സിസ്റ്റത്തിലും ഇതിനായി പ്രത്യേക മാറ്റങ്ങള്‍ ഉള്‍പ്പെടുത്തിയിട്ടുണ്ട്. കീബോര്‍ഡിന്റെയും ട്രാക്ക്പാഡിന്റെയും ഉപയോഗങ്ങള്‍ ഇത് മാറ്റില്ലെങ്കിലും ഇതൊരു അധിക സൗകര്യമായി മാത്രമുണ്ടാകും.

14 ഇഞ്ച് ഒഎല്‍ഇഡി മാക്ബുക്ക് പ്രോയുടെ പ്രാരംഭ വില 2,799-2,999 ഡോളറിനും ഇടയില്‍ (2,66,000-3,50,000 രൂപ) വരെ ആയിരിക്കുമെന്നാണ് സൂചന. മെമ്മറി, സ്റ്റോറേജ് ചിപ്പുകളുടെ ലഭ്യതക്കുറവും അത്യാധുനിക ടാന്‍ഡം ഒഎല്‍ഇഡി പാനലിലേക്കുള്ള മാറ്റവുമാണ് വില വര്‍ദ്ധനവിന് കാരണം.

Mekha P Panicker