Thiruvananthapuram

Mini Cooper Oxford Edition: മിനി കൂപ്പർ ഓക്സ്ഫോർഡ് എഡിഷൻ വിപണിയില്‍, വില 55.5 ലക്ഷം!

Written by: Mekha P Panicker Updated by: Roniya Baby

Published: Oct 19, 2026, 07:20 PM | Updated: Oct 19, 2026, 07:20 PM

മിനി ഇന്ത്യ പുതിയ കൂപ്പർ ഓക്സ്ഫോർഡ് എഡിഷൻ 55.5 ലക്ഷം രൂപയ്ക്ക് വിപണിയിലിറക്കി

മിനി ഇന്ത്യ (Mini India) 'കൂപ്പർ ഓക്സ്ഫോർഡ് എഡിഷൻ' (Cooper Oxford Edition) വിപണിയിലിറക്കി. ബിഎംഡബ്ല്യു ഗ്രൂപ്പിന്റെ ഓക്സ്ഫോർഡ് പ്ലാന്റിൽ മിനി കാറുകളുടെ നിർമ്മാണം ആരംഭിച്ചതിന്റെ 25-ാം വാർഷികാഘോഷത്തിന്റെ ഭാഗമായാണ് സ്പെഷ്യൽ എഡിഷൻ പുറത്തിറക്കിയിരിക്കുന്നത്.

ഇൻഡിഗോ സൺസെറ്റ് ബ്ലൂ, ചില്ലി റെഡ് എന്നീ രണ്ട് നിറങ്ങളിൽ കാർ തിരഞ്ഞെടുക്കാം. കാറിന്റെ റൂഫിന് മുകളിൽ യൂണിയൻ ജാക്ക് ഡെക്കൽ നൽകിയിട്ടുണ്ട്. പിൻഭാഗത്ത് ഡിക്കി വരെ നീളുന്ന ചുവപ്പും വെള്ളയും നിറത്തിലുള്ള വരകളും നൽകിയിട്ടുണ്ട്.

കാറിന്റെ ഡോർ സില്ലുകളിൽ നീലയും ചുവപ്പും നിറത്തിൽ ഓക്സ്ഫോർഡ് എന്ന് എഴുതിയിട്ടുണ്ട്. കറുത്ത നിറത്തിലുള്ള ജെസിഡബ്ല്യു-സ്പെക്ക് സീറ്റുകളും സ്റ്റിയറിങ്ങിന്റെ അടിഭാഗത്തായി ടെക്സ്ചേർഡ് ഫ്ലാഗ് പ്രിന്റും നൽകിയിട്ടുണ്ട്.

എൻഞ്ചിന്റെ കാര്യത്തിൽ മാറ്റമൊന്നുമില്ല. സാധാരണ മിനി കൂപ്പറിലുള്ള 2.0 ലിറ്റർ ഫോർ സിലിണ്ടർ ഡയറക്ട് ഇഞ്ചക്ഷൻ ടർബോ പെട്രോൾ എൻജിനാണ് ഓക്സ്ഫോർഡ് എഡിഷനിലും ഉപയോഗിച്ചിരിക്കുന്നത്. 204 hp 300Nm ഉത്പാദിപ്പിക്കുന്നു. 7 സ്പീഡ് ഡ്യുവൽ ക്ലച്ച് ഓട്ടോമാറ്റിക് ഗിയർബോക്സ് വഴിയാണ് മുൻ ചക്രങ്ങൾക്ക് പവർ നൽകുന്നത്. 6.6 സെക്കൻഡിനുള്ളിൽ 0-100 കിലോമീറ്റർ വേഗത കൈവരിക്കാനും 16.82 കിലോമീറ്റർ ഇന്ധനക്ഷമതയും ലഭിക്കുമെന്ന് മിനി അവകാശപ്പെടുന്നു.

ഒക്ടോബർ 8-ന് കാറിന്റെ പ്രീ-ബുക്കിംഗുകൾ ആരംഭിച്ചിരുന്നു. പരിമിതമായ എണ്ണത്തിൽ മാത്രമാണ് മിനി കാറ് നിർമ്മിക്കുന്നത്. ഉടൻ തന്നെ കാറിന്റെ ഡെലിവറി ആരംഭിക്കും. കാറിന്റെ എക്സ്-ഷോറും വില 55.5 ലക്ഷം രൂപയാണ്.

Mekha P Panicker