Thiruvananthapuram

Plastic Wrap Makeup Hack: പ്ലാസ്റ്റിക് റാപ്പ് മേക്കപ്പ് ഹാക്ക് പരീക്ഷിക്കാൻ പ്ലാനുണ്ടോ?

Written by: Mekha P Panicker Updated by: Karthika V

Published: Oct 08, 2026, 05:45 PM | Updated: Oct 08, 2026, 05:45 PM

സമയം ലാഭിക്കാനായി സമൂഹമാധ്യമങ്ങളിൽ പ്രചരിക്കുന്ന 'പ്ലാസ്റ്റിക് റാപ്പ് മേക്കപ്പ് ഹാക്ക്' ചർമ്മത്തിന് നല്ലതാണോ?

സമൂഹമാധ്യമങ്ങളിൽ മേക്കപ്പ് ട്രെൻഡുകൾ വളരെ വേഗം പ്രചരിക്കാറുണ്ട്. അത്തരത്തിലുള്ള ഒരു ഹാക്കാണ് ഇപ്പോൾ ചർച്ചയാകുന്നത്. 'പ്ലാസ്റ്റിക് റാപ്പ് മേക്കപ്പ് ഹാക്ക്' (Plastic Wrap Makeup Hack) എന്നാണ് ട്രെൻഡിന്റെ പേര്. മേക്കപ്പ് സാധനങ്ങൾ സ്പഞ്ചിന്റെയോ ബ്രഷിന്റെയോ സഹായമില്ലാതെ ഭക്ഷണ സാധനങ്ങൾ പൊതിയാൻ ഉപയോഗിക്കുന്ന പ്ലാസ്റ്റിക് റാപ്പിൽ തേച്ച് മുഖത്ത് പുരട്ടുന്നതാണ് രീതി. ഫൗണ്ടേഷൻ സ്പഞ്ചിൽ ഒട്ടിപ്പിടിച്ച് പാഴായിപ്പോകില്ലെന്ന വാദമാണ് ഈ ട്രെൻഡ് പ്രചരിപ്പിക്കുന്നവർ മുന്നോട്ടുവെക്കുന്നത്!

ഭക്ഷണ സാധനങ്ങൾ പൊതിയാൻ ഉപയോഗിക്കുന്ന ക്ലിംഗ് ഫിലിം എന്നറിയപ്പെടുന്ന പ്ലാസ്റ്റിക് റാപ്പാണ് മേക്കപ്പ് ചെയ്യാൻ വേണ്ടത്. ഇത് മുഖത്തിന്റെ ആകൃതിയിൽ വെക്കണം. ഇതിന് പുറത്താണ് മേക്കപ്പ് ചെയ്യുന്നത്. തലേദിവസം ഇത്തരത്തിൽ പ്ലാസ്റ്റിക് റാപ്പിൽ മേക്കപ്പ് ചെയ്ത് വെച്ചാൽ പിറ്റേദിവസം രാവിലെ വേഗത്തിൽ മുഖത്ത് ഒട്ടിച്ചെടുക്കാമെന്ന് പലരും അവകാശപ്പെടുന്നുണ്ട്.

പ്ലാസ്റ്റിക് റാപ്പിന് മുകളിലായി ഫൗണ്ടേഷനും കൺസീലറും ബ്ലഷും എന്തിന് ലിപ്സ്റ്റിക് വരെ ഇടാം. കൈകൾ ഉപയോഗിച്ച് പ്ലാസ്റ്റിക് റാപ്പിൽ ഇവ പരത്താം, ഇതിന് ബ്രഷും സ്പഞ്ചും ആവശ്യമില്ല.

ഇനി മേക്കപ്പ് പുരട്ടിയ പ്ലാസ്റ്റിക് റാപ്പ് തിരിച്ച് പിടിച്ച് മുഖത്ത് അമർത്തുക. എല്ലാ വശവും കൃത്യമായി അമർത്തണം. മേക്കപ്പ് ചർമ്മത്തിൽ പിടിച്ചുകഴിഞ്ഞാൽ പ്ലാസ്റ്റിക് റാപ്പ് പതിയെ മുഖത്തുനിന്ന് ഒഴിവാക്കുക. ഇതിനുശേഷം ഒരു സ്പഞ്ചോ ബ്രഷോ ഉപയോഗിച്ച് പതുക്കെ മേക്കപ്പ് മുഖത്ത് ബ്ലെൻഡ് ചെയ്യുക.

പ്ലാസ്റ്റിക് റാപ്പ് മേക്കപ്പ് ഹാക്ക് പൂർണ്ണമായും സുരക്ഷിതമല്ല. പ്ലാസ്റ്റിക് റാപ്പുകളിൽ വായുസഞ്ചാരം ഉണ്ടാകില്ല. ഇത് മുഖത്ത് അമിതമായി വിയർപ്പ് അടിഞ്ഞുകൂടുന്നതിനും മുഖക്കുരു, അലർജി എന്നിവ ഉണ്ടാകുന്നതിനും കാരണമാകും. കിച്ചണിലോ മറ്റോ ഉപയോഗിക്കുന്ന പ്ലാസ്റ്റിക് റാപ്പുകളിൽ ബാക്ടീരിയകൾ ഉണ്ടാകാൻ സാധ്യതയുണ്ട്. ഇത് മുഖത്ത് നേരിട്ട് വെക്കുമ്പോൾ ചർമ്മത്തിന് ഇൻഫെക്ഷൻ ഉണ്ടാകാം. ഒരിക്കലും ബ്രഷും സ്പഞ്ചും ഉപയോഗിക്കുന്നതുപോലെയുള്ള സ്വാഭാവിക ഫിനിഷിങ് ചർമ്മത്തിന് നൽകാൻ പ്ലാസ്റ്റിക് റാപ്പിന് സാധിക്കില്ല.

Mekha P Panicker