Thiruvananthapuram

Candy Crush Saga Record: കാൻഡി ക്രഷ് സാഗയിൽ 22,222 ലെവൽ കടന്ന് കൗമാരക്കാരന്‍!

Written by: Mekha P Panicker Updated by: Karthika V

Published: Oct 06, 2026, 05:31 PM | Updated: Oct 06, 2026, 05:31 PM

കാൻഡി ക്രഷ് സാഗ ഗെയിം കളിച്ച് ഇന്റർനാഷണൽ ബുക്ക് ഓഫ് റെക്കോർഡ്സിൽ ഇടംനേടി കൗമാരക്കാരന്‍

ഗെയിം കളിച്ചാൽ എന്ത് കിട്ടും? പലപ്പോഴും മുതിർന്നവർ കുട്ടികളെ വഴക്ക് പറയുന്നത് ഇതും പറഞ്ഞാണ്. എന്നാൽ ഇന്റർനാഷണൽ ബുക്ക് ഓഫ് റെക്കോർഡ്സിൽ ഇടം നേടുമെന്ന് പറഞ്ഞാലോ? ബീഹാറിൽ നിന്നുള്ള 19 കാരനാണ് 'കാൻഡി ക്രഷ് സാഗ' (Candy Crush Saga) എന്ന ജനപ്രിയ മൊബൈൽ ഗെയിമിൽ 22,222-ാം ലെവൽ പിന്നിട്ട് റെക്കോർഡ് സ്വന്തമാക്കിയത്.

ഇന്റർനാഷണൽ ബുക്ക് ഓഫ് റെക്കോർഡ്സിന്റെ ഔദ്യോഗിക വെബ്സൈറ്റ് പ്രകാരം 2026 ജൂലൈ 5-നാണ് ശുഭം കുമാര്‍ നേട്ടം കൈവരിച്ചത്. കാൻഡി ക്രഷ് സാഗയിൽ ഒരു കൗമാരക്കാരൻ നേടുന്ന ഏറ്റവും ഉയർന്ന ലെവൽ (Highest Level Achieved in Candy Crush Saga - Teenager) എന്ന വിഭാഗത്തിലാണ് ഇന്റർനാഷണൽ ബുക്ക് ഓഫ് റെക്കോർഡ്സില്‍ ശുഭം കുമാറിന്റെ പേര് വന്നത്.

ബീഹാറിലെ ദിഘ്വാരയിൽ നിന്നുള്ളയാളാണ് ശുഭം കുമാർ. നിലവില്‍ ശുഭത്തിന്റെ കൂടുതല്‍ വിശദാംശങ്ങൾ ലഭ്യമല്ല. 22,222 ലെവലിൽ എത്താൻ അദ്ദേഹം എത്ര സമയം ചെലവഴിച്ചു എന്നതിനെക്കുറിച്ചോ ഗെയിമും പഠനവും തമ്മിൽ എങ്ങനെ ബാലൻസ് ചെയ്തു എന്നതിനെക്കുറിച്ചും റിപ്പോര്‍ട്ടുകള്‍ ലഭ്യമല്ല.

വിദ്യാർത്ഥികളുടെ വിജയം അക്കാദമിക് പ്രകടനം, കായികം മുതലായവയില്‍ മാത്രമായിരിക്കില്ല ഉണ്ടാകുക. മറ്റ് വ്യക്തിപരമായ കാര്യങ്ങളിലും ഉണ്ടാകാം. പഠനരീതികൾക്ക് പുറത്തുള്ള ഒരു അംഗീകാരമാണ് ശുഭത്തിന്റെ റെക്കോർഡ്. മുന്‍പും കാൻഡി ക്രഷ് സാഗയില്‍ ഇത്തരം റെക്കോര്‍ഡുകള്‍ ഉണ്ടായിട്ടുണ്ട്.

ഒരേ നിറത്തിലുള്ള മൂന്നോ അതിലധികമോ മിഠായികൾ അടുത്തടുത്തേക്ക് മാറ്റി വരിയായി വെച്ച് അവ പൊട്ടിച്ചു കളയുകയാണ് കാൻഡി ക്രഷ് സാഗ. ഓരോ ലെവലിലും തന്നിരിക്കുന്ന നിശ്ചിത നീക്കങ്ങൾക്കുള്ളിൽ നിശ്ചിത ലക്ഷ്യങ്ങൾ പൂർത്തിയാക്കണം. ലെവലുകൾ മുന്നോട്ട് പോകുന്തോറും ഗെയിം കൂടുതൽ ബുദ്ധിമുട്ടേറിയതായി മാറുകയും പുതിയ വെല്ലുവിളികൾ എത്തുകയും ചെയ്യും.

Mekha P Panicker