Thiruvananthapuram

Sleep Competition Matt Race: ഉറങ്ങാന്‍ മത്സരം, സമ്മാനത്തുക 12 ലക്ഷം! ജപ്പാനിലെ 'മാറ്റ് റേസ്' വൈറല്‍

Written by: Mekha P Panicker Updated by: Roniya Baby

Published: Oct 07, 2026, 04:12 PM | Updated: Oct 07, 2026, 04:12 PM

ലോകത്തിലെ ഏറ്റവും ഉറക്കം കുറഞ്ഞ രാജ്യത്ത് 'ഉറക്ക മത്സരം' സംഘടിപ്പിച്ച് ഒരു മെത്ത കമ്പനി

ഉറക്കക്കുറവുള്ള രാജ്യമാണ് ജപ്പാൻ. എന്നാൽ ജപ്പാനെ ഉറക്കാൻ തന്നെ ഒരു മെത്ത കമ്പനി തീരുമാനിച്ചു! ഇതിന്റെ ഭാഗമായി 'മാറ്റ് റേസ്' (Matt Race) എന്ന പേരിൽ കോല എന്ന കമ്പനി ടോക്കിയോയിൽ ഒരു ഉറക്ക മത്സരം സംഘടിപ്പിച്ചു. ആരാണ് ഏറ്റവും വേഗത്തിലും ആഴത്തിലും ഉറങ്ങുന്നത് എന്ന് കണ്ടെത്താനാണ് ഈ മത്സരം നടത്തിയത്.

മത്സരത്തിന്റെ വിജയിക്ക് നൽകുന്നത് രണ്ട് ദശലക്ഷം ജാപ്പനീസ് യെന്നാണ്, അതായത് 12.24 ലക്ഷം ഇന്ത്യൻ രൂപ! മത്സരത്തിൽ പങ്കെടുക്കുന്നവരെ സ്ലീപ്പ് ട്രാക്കിംഗ് ഉപകരണങ്ങൾ ധരിപ്പിച്ചാണ് കിടത്തിയത്. ഇവർക്ക് 90 മിനിറ്റ് വരെ ഉറങ്ങാൻ സമയവും നൽകി.

സുയിമി എന്ന വ്യക്തിയാണ് മത്സരത്തിൽ വിജയിച്ചത്. ലഭിച്ച തുക ഉപയോഗിച്ച് താൻ വീട് മാറുമെന്നും അവിടേക്ക് ഇതേ കമ്പനിയുടെ മെത്ത വാങ്ങുമെന്നും വിജയി പ്രതികരിച്ചു. അതേസമയം മത്സരം വളരെ പെട്ടെന്ന് കഴിഞ്ഞുപോയെന്നും ഉറങ്ങാൻ കുറച്ചുകൂടി സമയം കിട്ടിയിരുന്നെങ്കിൽ എന്ന് ആഗ്രഹിച്ചുപോയെന്നുമാണ് മറ്റ് മത്സരാർത്ഥികളുടെ പരിഭവം.

ജപ്പാനിൽ ആളുകൾക്ക് ഉറക്കം കുറവാണെങ്കിലും അവർ കഠിനാധ്വാനം ചെയ്യുന്നവരാണെന്ന് കോല സ്ലീപ്പ് ജപ്പാൻ മെത്ത കമ്പനിയുടെ ക്രിയേറ്റീവ് ഡയറക്ടർ റീചിരോ നകാമ പറഞ്ഞു. മത്സരം ഒരാഘോഷമാക്കി മാറ്റുന്നതിലൂടെ ആളുകൾക്ക് ഉറക്കത്തിന്റെ പ്രാധാന്യം മനസ്സിലാക്കിക്കൊടുക്കാൻ കഴിയുമെന്ന് അദ്ദേഹം കൂട്ടിച്ചേർത്തു.

2005-ല്‍ ജപ്പാന്‍ മള്‍ട്ടി-ഇന്‍സ്റ്റിറ്റ്യൂഷണല്‍ കൊളാബറേറ്റീവ് കോഹോര്‍ട്ട് ഡൈക്കോ സ്റ്റഡി (Japan Multi-Institutional Collaboraive Cohort Daiko Study) പ്രകാരം 2,091 പേരുടെ വിവരങ്ങള്‍ പരിശോധിച്ചതില്‍ 11.8% ആളുകള്‍ക്കും ആവശ്യത്തിന് ഉറക്കം ലഭിക്കുന്നില്ല. 2021-ലെ കണക്കുകള്‍ പ്രകാരം ജപ്പാനിലെ ആളുകള്‍ പ്രതിദിനം 7 മണിക്കൂറും 24 മിനിറ്റും മാത്രമാണ് ഉറങ്ങുന്നത്. പട്ടികയില്‍ ഉള്‍പ്പെട്ട ഒഇസിഡി രാജ്യങ്ങളില്‍ ഏറ്റവും കുറഞ്ഞ ഉറക്കമുള്ള ജനവിഭാഗം ജപ്പാനിലേതാണ്.

Mekha P Panicker